Тәлім мен тәрбиесі бөлек Әкенің аты қашанда әке ғой. Асқар таудай алып әкеңнің бар болғандығына не жетсін? Әкенің тәлімін көріп, одан зор ықылас пен мейірім алған, қанша жерден сұсты болса да ұлы Абайдың өзі, әкесі Құнанбайды ақылшым, бағыттаушым деп өзіне пір санаған. Тек, уақыт талабымен сөз полициясының ыңғайы ымымен Құнанбайдың образын сомдағанда, салқын қанды, мінезі тік, ожарлау кісі деп жарықтық Әуезов амалсыз суреттеп жіберген.
Әкесінің тәлімін алған баланың өжет болатындығы, қиындықты жеңіп, қиыннан қиыстырып жол табатындығы әу бастан қазақ даласында насихатталып келе жатыр. Ресейлік империяға қосылып, коммунистік идеялогияның бағытымен қоғамдағы әке рөлінің әлсіреп, билік отанасына ауысқан соң, расында да «тәйт!» дейтін әкенің ықпалы әлсіреп қалды. Баяғыда жарықтық аналарымыз «алдымен әкең келсін, әкеңсіз ас ішпе, далада шаршап жүр!..»-дейтін. Қазір уақыт басқа, талап басқа. Батыстық бағытпен қоғамда әкесіз өскен ұл мен қыз көбейіп келе жатыр. Бұл да бір уақыттың кем тұсы, ащы көрінісі. Иә, әкелердің қоғамдағы рөлін қалай арттырамыз. Осы мақсатта қазіргі күні қыруар жұмыстар атқарылып жатыр.
Әкелер мерекесіне орай, өткен аптада Щучинск қаласындағы №9 мектеп-гимназиясының қабырғасында өткізілді. «Абыройлы әке, қадірлі отағасы, ұлықты ұл» атты танымдық-шығармашылық кеш ұйымдастырылды. Ақмола облыстық Әкелер одағы қолдап, Аналар кеңесі, Ақмола облыстық ішкі саясат басқармасы, «Аманат» партиясы аудандық филиалы, Бурабай аудандық Мәдениет үйі, Бурабай аудандық білім бөлімі ат салысып, әке мәртебесін көтеру мақсатында мазмұнды іс-шара өткізілді.
Мектеп директоры Бибігүл Кушекова мен Ақмола облыстық Әкелер одағының басшысы Ерлан Жәкімұлы құттықтау сөз сөйлеп, әкелер мерекесінің құндылығын атап өтті. Кеш барысында қонақтармен сұхбат, «Мерейлі отбасы» ұлттық конкурсының жүлдегерлері Қалмағанбетовтар отбасы тәрбие тағылымдарымен бөлісу, әкелер мен балалар арасында шығармашылық жұмыс, жас әкелермен тренинг, айтыстан үзінді, ән шашу, әке мен қыздар арасында вальс, ауданның үздік әкелерін марапаттау сәттері өте әсерлі болды.
Кеш соңында Ақмола облыстық Әкелер одағының ұсынысымен Шортанбай Қалмағанбетов Бурабай ауданы әкелер кеңесінің төрағасы, Арман Досмағамбетов әкелер кеңесі басшысының орынбасары болып тағайындалса, Әлімхан Аймахан Ақмола облыстық Әкелер одағы басшысының орынбасары болып бекітілді. Ауданымыздағы үздік әкелеріміз жас ұрпақтың игілігі үшін ат салысады деп ойлаймыз. Әке мәртебесі асқақтай берсін!
Осындай әкеге де, анаға да, балаға да тағылымы мол шаралар өз жалғасын таба береді деген үмітіміз зор. Ақмола облыстық, Бурабай аудандық Әкелер одағының озық тәжірибелері әке мәртебесін асқақтату жолында үлгі болып, еліміздің ертеңгі келешегінің атар таңы арайлы болады деген зор сеніммен жиынды түйіндедік.
«Бурабай-ақпарат»
Redaktor