Кітапхана дүниеде ештеңе теңестірілмейтін білім бұлағының көзі, ғасырдан-ғасырға адамзат тарихының құнды сырларын сүріндірмей әкеле жатқан шырағы биік, парасаттылық пен білімділіктің, біліктіліктің нағыз киелі ордасы.
Кітапхана оқырман үшін үлкен өмір мен тәрбие ошағы. Сыры мол сырға толы сансыз жауабы табылмаған сұрақтың шешуін тапқан қайталанбас білім ордасы. Қасиетті кітаптарымызды олардың ішіндегі алтынға да айырбастауға келмейтін қазыналарымызды көздерінің қарашынғындай сақтап, насихаттап, ел игілігіне жаратып жүрген кітапханашылардың еңбегі орасан зор. Абыройлы мамандықтың қиындығы мен қызығын арқалап жүрген мамандық иелерінің болашақ саналы ұрпақты тәрбиелеу жолында сіңірген еңбегі ұшаң теңіз.
Бүгінде адалдықтың ақ жүгін арқалаған кітапханашылардың айтулы мерекесі қазан айының жиырма төрті «Кітапханашылар күні» биыл екінші рет мерекеленуде.
Қазақстан Республикасы Мәдениет және ақпарат министрлігінің қолдауымен, Қазақстан Республикасының Ұлттық академиялық кітапханасының ұйымдастыруымен Кітапханашылар күні мерекесіне орай «ЖАС КІТАПХАНАШЫ 2023: ЖАҢА МҮМКІНДІКТЕР УАҚЫТЫ» атты жастар форумы өтті.
Байқауға Республика бойынша 16 облыстан 42 жас кітапханашылар қатысты. Бірінші кезеңде жас кітапханашы мамандар арасында бейне-Reels форматында авторлық жоба ұсынып, екінші кезеңге үміткерлердің ішінен үздік деп танылған 10 маман өз жобаларын қорғап, бақ сынасты.
Бурабай ауданы орталықтандырылған кітапханалар жүйесінен орталық аудандық балалар кітапханасының кітапханашысы Жадра Жасұланқызы Куанышбекова кітапхананың «Досым оқыған кітап» оқу жобасы бойынша бейне-ролик дайындап, 5 үздік жоба қатарына енгізіліп, Бірінші орын алып, Үздік жоба атанды. Арнайы сыйлық 100 мың теңге сертификатпен марапатталды. Әріптесімізді лайықты жеңісімен құттықтаймыз!
Кітап пен кітапхананың тіршілігіне жан беретін, ұлттық құндылықтар мен оқырмандар арасын жалғастырушы кітапханашылар. Ал кітапхана — әр бір оқырманның жүрегі, бір бөлігі. Жаңа заман дәуірі болғанымен рухани азық іздеген, көзі ашық, көкірегі ояу әрбір оқырманның келер шаңырағы — кітапхана…
Г. Апенова
Орталық аудандық балалар
кітапханасының жетекшісі