Құрметті Бурабай ауданының тұрғындары сіздерді мүбарак Рамазан айының келуімен шын жүректен құттықтаймын! Он екі айдың сұлтаны болған қасиетті рамазан айы баршамызға берекелі болсын. Мұсылманның бес парызының алғашқысы Кәлима шаһадат яғни Алладан басқа құлшылыққа лайықты Құдай жоқ, Мұхаммад Алланың құлы әрі Елшісі екендігіне куәлік беру болса, екінші парыз баршаңызға белгілі 5 уақыт намаз оқу, үшіншісі дүние мүлкің көп болса зекет беру, ал төртіншісі жылына бір рет Рамазан айы келген кезде Рамазан айының оразасын ұстау, бесінші парыз ол шамаң жетсе өміріңде бір рет қажылыққа бару. Міне осы 5 үлкен құлшылықты Алла тағала бізге парыз еткен. Бұл бес құлшылық ислам дінінің тіректері. Әрбір мұсылманмын деген адам осы бес парызды орындауы қажет. Аллаһтың қалауымен баршамыз қасиетті, берекелі Рамазан айына кіргелі тұрмыз. Жоғарыда айтқандай бұл айда ораза ұстау мұсылманның бес парызының бірі. Бір ай бойы таң атқаннан кеш батқанға дейін Алланың разылығы үшін ораза ұстау бұл біздің тек қана тәнімізге ғана емес жан дүниемізге өте пайдалы. Әлбетте біз оразаны пайда үшін емес, Әлемдердің Раббысы бізге парыз еткені үшін ұстаймыз. Алла тағала біздерге парыз еткен заттарында өте мол хикмет пен даналық бар, сол секілді Алла тағала біздерге харам еткен заттарда яғни тиымдарында біздерге зиян нәрсе бар екені белгілі. Себебі Алла тағала құлдарына өте мейірімді, ерекше рахымды. Біз рамазан айында Алланың парыз еткен оразасын тек қана Алла разылығы үшін, Алла тағала біздерге парыз еткендігі үшін ұстайтын болсақ, біздің жанымызға да тәнімізге де өте пайдалы болмақ. Біз бір ай бойы рамазанның күндізін Алланың бізге адал еткен асынан, адал еткен суынан, және өзімізге адал болған жұбайымызбен қосылудан тиыламыз. Баршамыз жұмыс істеп жүргендіктен қатты шөлдеп, қажыр-қайратымыз таусылып, күшіміз әлсіреуі мүмкін. Бірақ бұл шаршау тек рамазанның басында ғана болмақ, және де бұл шаршап, бұл қиналу тек осы дүниеде болмақ. Есесіне бұл қиындық біздерді қияметтің қиындығынан, тозақтың отынан сақтайды. Осы жалған дүниеде жетістікке жетіп өзімізді бақытты сезінерміз, алайда ахиретіміз жаннат болмаса онда бұл дүниенің бақытынан не пайда? Сол секілді осы өмірде қиналып алайда қияметте жетістікке жетіп жатсақ бұл қиындықтың несі қиындық. Пайғамбарымыз Оған Аллаһтың салауаты мен сәлемі болсын, өзінің хадистерінде айтып кеткендей Рамазанның әр түндерінде тозақтан азат етілетін Алланың құлдары болады. Міне осы рамазанда баршамыз Аллаға шынайы иманмен сауабын тек Алладан ғана үміт етіп ораза ұстайтын болсақ, тозақтан азат етілетін құлдардың қатарына енеріміз ақиқат. Алла тағала баршамызды солардың қатарынан етсін деп тілеймін. Қасиетті рамазан айы берекелі болсын!
Бурабай аудандық мешіттің баспасөз қызметі