Қазақ халқының ұлттық мейрамдарының ішінде Наурыз мейрамының мағынасы өте зор. Наурыз мерекесі тәлім-тәрбиеге толы. Атап айтар болсақ, бұл күні Наурыз көже пісіріліп, халық бір біріне жақсы көңілдерін білдіріп, артық кеткен жерлері болса кешірім сұрап, татуласып Наурыз көжеден дәм татады. Ата-бабамыздың тәрбиеге толы салт-дәстүрлерін еске түсіріп жаңғыртады. Келешек ұрпақтың ата-баба дәстүрінен мол тағлым алуына септігін тигізеді.
Үлгі-өнегеге толы Наурыз мерекесі Қарабұлақ ауылының негізгі орта мектебінде де аталып өтті.
Ұлы той жүргізушінің:
Уа, жарандар, жарандар!
Бәрің бермен қараңдар!
Естіп ұғып алыңдар,
Наурыз тойы басталды,
деген сөзімен басталып, Нұржан Айғожақызының және Алмагүл Құлымбетқызының орындауындағы халық әні “Той базарға” ұласты.
Қуанышқа шашу шашу- қазақтың ежелден келе жатқан дәстүрі.
Қазақтың бір салты деп,
Тойға шашу шашайық,- деп шашуға кезек беріліп, Мәке апамыз бен Қымбат тәтеміз жиналған қауымға қазақтың дархан көңіліндей мол шашу шашты.
Мектеп басшысы Гүлден Естайқызының тілегінен кейін Жазира Қанатқызының орындауында “Қазақтың дәстүрлері” әні шырқалып, “Бастаңғы” дәстүрі бойынша қойылым қойылды. Бастаңғыда жеңгенің рөлін Бегайдар Күншуақ, қайын сіңілінің рөлін Бектасова Аяжан және қайнының рөлін Мағзұм Әбілқайыр сомдады. Қойылым барысында қонақ кәде, ауылдың алтыауызы, наурыз көже жайлы мол түсінік беріле отырып, “Сақина қайда” атты ойын арқылы мерекелік бағдарлама әрі қарай жалғасты. Ауылдың алтыауызын 9-сынып оқушысы Темертас Жансұлу бастап, “Қазағым-ай” әнін орындады. Бастаңғыға жиналған оқушылар қонақ кәде ретінде өз өнерлерін көрсетіп, жұртшылықтың қошеметіне бөленді. Мысалы, Әбілқайырдың, Қабілеттің, Мансұрдың, Хазіреттің, Исламның орындауында “Жаса, қазағым” әні Жауқазын” би тобының орындауында “Асатаяқ” биі, Көркем және Нұрайдың орындауында “Наурыз”, Жансая “Наурыз көктем”, Жансая Көркем Мөлдір “Наурыз тойы” және Көркем “Наурыз”, Жарқынай “Алақай, Наурыз келді”, Қасым мұғалімнің орындауында Шәмшінің әндері, Аяжан, Ақнұр, Көркем, Қабілет және Ерболат мұғалімнің орындауында “Кеңес күйі”.
Ұлттық құндылығымызды дәріптейтін Наурыз тойының дәмді тағамы Наурыз көжені ішуге Мөлдір “Дастарқан” әнін арнады.
Наурыз көже ішіліп, бата жасалғаннан кейін спорттық ойындарға кезек берілді. Бұл ойындарды мектебіміздің дене шынықтыру пәні мұғалімі Райымбеков Қасым өткізді. Балалар белсене қатысып, жүлделі орындарға бағалы сыйлықтар тапсырылды.
Наурыз тойына қатысқан оқушылардың бәріне де сыйлықтар берілді.
Ұлттық мерекемізді өткізуге қаржылай көмектескен “ЕЖШС”-не, өнерлерімен көпшілік алғысына бөленген, ұлттық дәстүрімізді дәріптеуге атсалысқан оқушыларыма, Жаңа жылдың дастарқанының басты тағамы- Наурыз көжені дайындаған және келген қонақтарымызды қазақтың қонақжайлық дәстүрімен күткен Абдрахманова Алия, Абдрахманова Қамар, Исенова Жанка және Айтқожина Қарлығаш сияқты келіндеріме, мектеп өміріне өз үлесін қосып жүрген Алмагүл Құлымбетқызына алғысымды білдіремін.
Келген жылымыз құтты болсын! Елімізде бейбіт өмір болып, береке мен молшылықта өмір сүрейік.
Нұржан Абдрахманова, Қарабұлақ негізгі орта мектебінің мұғалімі