…90 жылдардың аяқ кезінде, ауылшаруашылығы сан-салаға бөліп, баяғы орталықтардың түндігі жабыла бастады. Иә, «қазына мүлкі» деп түсінетін халықтың ішінен суырылып шыққандардың қолы қимылдап, жеке шаруашылық ашып, егін егіп, мал өсіріп әйтеуір уақыт талабымен нарықтық кезеңге қадам басты. Бұрындары ақпарат бетінен «шетелде жеке-жеке фермерлер бар екен, салығын төлеп, шаруасын күйіттеп өзімен өзі болып отыр екен, капиталистік жүйе ғой» дейтін, біздерге де келіп жеткенде біразы аңтарылып қалды. Бірақ, көш жүре түзелер деген данышпан халқымыздың ішінен суырылып шығып ауылшаруашылық саласына бет бұрып, егін егіп, мал өсіріп, тіпті құс өсіріп баптаған талайлар шықты. Ауылшаруашылық саласы, жалпы қазақтың әу бастан келе жатқан саласы деуге толық негіз бар. Көшпелі қазақтың табиғатпен бірге тілдесіп, табиғат аясында жүріп, малшаруашылығын терең меңгергендігі бәрімізге мәлім. Қазіргі күні, ауданымыз егіншаруашылығы, малшаруашылығын қатар дамытып жатыр.
Өткен аптада Бурабай ауданына қарасты, ауылдарда еңбек етіп жатқан ауылшаруашылық саласының еңбеккерлері күні салтанатты атап өтілді. Алқалы басқосуға Бурабай ауданының әкімі Арай Садықов, аудандық мәслихат төрағасы Малика Нұрпанова, бірқатар сала басшылары қатысты. Аудан әкімі ауыл еңбеккерлерін төл мерекелерімен құттықтап, «Еліміздің экономикалық тұрғыда дамуына ат салысып жатқан ауыл еңбеккерлерінің еңбегі қашан да адал, әрбір дәні қамбаға түскенше дамыл таппайтындықтарыңызды жақсы білеміз, сіздердің еңбектеріңізді ешқашан ұмытпаймыз, шаруалардың жағдайы жақсаруы үшін, мемлекет қолынан келгенше көмектесіп жатыр, сіздердің ерік-жігерлеріңіздің, күш-қайраттарыңыздың арқасында қамбамыз астыққа, жайлауымыз малға толып отыр»,-деді. Мұндай қуанышты сәтте, тойдың көркі, жиынның көркі марапат қой, еңбектің еленіп, елдің ықыласына бөленетін. Щучинск қаласындағы Ә. Бөкейханов атындағы Қазақ орман және агроорман шаруашылығы ғылыми-зерттеу институтының ардагері, ардақты ақсақал Болат Мұқановқа Бурабай ауданы әкімінің «Алғыс хаты» табысталды. «Еңбек ардагері» төсбелгісімен «Журавлевка-1» ЖШС-нің директоры Николай Радченко, «Құрметті ардагер» «Машрапов» шаруа қожалығының басшысы Алма Машрапова, І дәрежелі «Еңбек даңқы» төсбелгісімен «Қоянды Агро» ЖШС-нің басшысы Қазбек Ахметов, ІІ дәрежелі «Еңбек даңқы» төсбелгісімен жеке кәсіпкер Болат Абдрахманов, ІІІ дәрежелі «Еңбек даңқы» төсбелгісімен «Қамқор» ЖШС-нің басшысы Назымбек Сұлтанов, «Complex-R» ЖШС-нің басшысы Әлішер Сердалин, «Нарж» ЖШС-нің басшысы Валерий Нарижный, «Complex-R» ЖШС-нің директоры Анатолий Безуховтарға салтанатты түрде табыс етілді.
Қазақстан Республикасы Ауыл шаруашылығы министрінің құрмет мадақтамасымен, «Обалы» ЖШС-нің басшысы Әскер Жоламанов, «Жаңажол агро» ЖШС-нің механизаторы Сұңғат Дүйсенбаев марапатталды.
Жиын барысында аудандық мәслихат төрағасы Малика Нұрпанова, ауылшаруашылық саласының мамандарын өз атынан құттықтады. Жиын соңы мерекелік концертке ұласты.
Redaktor