Қазақстан Республикасының Оқу-ағарту министрлігінің орта білім беру комитетінің «2023 жылдың үздік мұғалімі» аталымы бойынша № 9 мектеп-гимназиясының қазақ тілі әдебиет пәнінің мұғалімі Гүлайым Тастанқызы Қалмағанбетова жеңімпазы атанды. Гүлайым Қалмағанбетова, білікті ұстаз. Алдынан білім нәрінен сусындаған талай-талай шәкірттері білім шыңдарынан көрініп, аудандық, облыстық, республикалық байқауларға қатысып, жүлделі орындарға ие болып жүр.
Редакция тапсырмасымен біз ардақты ұстаздың өзімен жолығып, тілдесіп қайттық.
— ХХІ ғасырда технологиясы дамыған заман. Білімді мыңды жығар демекші, өзіңіздің тұла бойыңыздағы біліміңізді жас ұрпаққа арнап келе жатқан ұстаздың бірісіз, алып жатқан жүлдеңіз, марапатыңыз құтты болсын. Қазіргі білім саласының беталысы жайлы тоқтала кетсеңіз?
— Ұстаз болу кез-келген адамның қолынан келе бермейтін ұлы мамандық. Патшалардың патшасының өзі, ұстаздың алдынан дәріс алып қолына қалам ұстайды. Ұстаздық жолы қиын жол ғой. Ұстаз болу жүректің батырлығы демекші, өзім осы салада 26 жылдан бері еңбек етіп келе жатырмын. Әрине, алдымнан талай-талай шәкірттерім қанат қағып ұшып жатыр. Әрбір шәкіртім менің мақтанышым. Солармен мақтана алам, солармен өзімнің жеткен жетістігімді көре алам.
— Киелі қара шаңырақ атанған №9 мектеп-гимназиясы жалғыз республикада ғана емес, шетелге де шығып, білім додасында өздерінің білімдерімен танылып жүр. Бұның барлығы өздеріңіз сияқты ұстаздың арқасы деп білеміз. Оқушыларыңыздан қандай үміт күтесіз?
— Қазіргі оқушылардың барлығы өте талғампаз, білімге құштар. Мысалы мен тіл маманымын. Көпшілік шәкірттерім ұстаз болсақ деп армандап, менің жолымды қуып, филология саласына барып оқуға түсіп жатыр, әрине грантқа. Бұл менің мақтанышым, еңбегімнің ақталғаны деп түсінем.
Осы аптада Қазақстан Республикасының Оқу ағарту министрлігінің орта білім беру комитетінің «2023 жылдың үздік мұғалімі» аталымы бойынша Астана қаласында өтетін алқалы жиынға қатысқалы отырсыз, көңіл күйіңіз қалай?
— Көңіл күйім тамаша, осындай дәрежеге жетіп марапат алуым, ұзақ жылғы еңбегімнің арқасы ғой.
— Әңгімеңізге рахмет! Ісіңізге сәттілік, шығармашылық табыс тілеймін.
— Рахмет!..
Жеңіс Оспанов
Redaktor