Қасым-Жомарт Тоқаев: Біз озық технологиялар көшінің басында болуымыз керек

Мемлекет басшысы Қасым-Жомарт Тоқаев Алматыдағы Ғылым ордасында жас ғалымдармен кездесіп, осы салаға қатысты өзекті мәселелерді ортаға салды.

— Бүгін сіздермен Ғылым ордасында жиналып отырмыз. Бұл — қазақ ғылымының қара шаңырағы, — деп сөз бастаған Президент біраз жылдан бері жөн­деу көрмеген ғимараттың қайта жаңарғанына қуанышын білдірді.

— Өздеріңіз жақсы білесіздер, соңғы кездері бұл ғимарат әбден тозып кетті. Сондықтан мен осыдан екі жыл бұрын бұл жерде күрделі жөндеу жүргізу жөнінде нақты тапсырма бердім. Содан бері біраз шаруа атқарылды. Іші де, сырты да заман талабына сай жаңғыртылды. Ең бастысы, ғимараттың тарихи келбеті сақталды. Жыл соңына дейін бұл жұмыс толық аяқталады, абаттандыру жұмысы жүргізіледі. Жаңарған Ғылым ордасы бүгінгі және болашақ ғалымдар үшін қызмет ете береді. Жалпы, осы жерде халқымыздың көптеген көрнекті ғалымы еңбек еткен. Ғылым ордасында есімі ел тари­хында жазылған біртуар тұл­ғала­рымыздың ізі қалған. Сондай ұлт перзенттерінің бірі әрі бірегейі — академик Қаныш Сәтбаев. Биыл ғалымның туғанына 125 жыл толды. Академик Қаныш Сәтбаев елімізді өркендетуге орасан зор үлес қосты. «Ғалымның хаты өлмейді» деген. Халқымыз әлі күнге дейін оның ашқан жаңалықтарының игілігін көріп отыр. Қазір — ғылым мен білімнің заманы. Отанымызды көркейтеміз десек, ең алдымен осы екі саланы дамытуымыз керек. Бұдан басқа жол жоқ, — деп ой сабақтады.

Жиында ғылым саласына қа­тысты мәселелер жан-жақты тал­қы­ланды.

Мемлекет басшысы шикізатқа арқа сүйеп отырған ел алысқа бармайтынын, бізге инженерлер, өнертапқыштар қажет екенін жеткізді.

— Мамандарымыз әлемдік бә­секеге төтеп бере алатындай бі­лімді, білікті болуы керек. Бүгінде алпауыт елдердің арасында барлық салада бақталастық өршіп тұр. Біз осы күрделі кезеңде экономиканың жаңа үлгісіне көше бастадық. Әділ, инклюзивті әрі бәсекеге қабілетті экономика құруға кірістік. Ғылым мен ин­новация оның басты тірегі болуға тиіс.Біз көшке ілесетін емес, көшті бастайтын елдердің қатарында болуымыз керек. Бір сөзбен, ғылыми әлеуетімізді арттыру қажет. Жалпы, осы бағытта біраз шаруа атқарылып жатыр. Мен Ғылым және технологиялар жөніндегі ұлттық кеңес отырысында бірқатар нақты тапсырма бердім. Барлық мәселе ме­нің тікелей бақылауымда. Қазір «Ғылым және технологиялық саясат туралы» заң жобасы Пар­ламентте қаралып жатыр. Кеше Сенат оны бірінші оқылымда мақұл­дады. Бұл — өте маңызды әрі көп­тен күткен құжат. Ғылымды басқару жүйесін жетілдіру керек. Ға­лымдарға әлеуметтік қолдау көр­сету мәселесі де өте маңызды. Сон­дықтан Заңда ғы­лыми қа­уымдастық мүддесі барынша ес­керілетін болады, — деді ол.