Малгелді Қайыржанұлы
Жұмағұловтың рухына
Малгелді Қайыржанұлы Жұмағұлов 1943 жылы наурыз айында бұрынғы Көкшетау облысы, Щучье ауданының Түлкілі ауылында дүниеге келеді. 1959 жылы Зеренді ауданының Қарашілік орта мектебін аяқтап, Қатаркөлдің зоотехникалық техникумына оқуға түседі. осы оқу орнын ойдағыдай бітіріп, қолына зоотехниктің дипломын алған жас жігіт Щучье ауданына қарасты Юрьевка, Жамантұз шаруашылықтарында зоотехник болып еңбек жолын бастады. 1963 жылы әскер қатарына шақырылып, Қиыр Шығыс әскери округінде, оқу ротасының кіші командирі болып Отан алдындағы борышын атқарды. Старшина әскери дәрежесін алды. Осылайша әскери міндетін тиісті дәрежеде атқарып, ауылына келген жас жігіт, отау құрып, үйленіп, Алма Балтабайқызымен шаңырақ көтерді. Елге оралған маман-зоотехник Малгелді Қайыржанұлы аудан басшылығының ұсынысымен Веденов шаруашылығына зоотехник болып орналасты. Осы жерде абыроймен бес жыл қызмет істеген, қолынан іс келетін, жақсы жағынан көзге түскен жас маман М.Қ. Жұмағұлов Юрьев совхозының ауылдық Кеңесіне төрағалық қызметке сайланады. Осы қызметте жүріп өмірлік тәжірибе жинақтап, елдің мұң-мұқтажын түсініп, жәрдем қолын созудан жалықпайтын азамат ретінде қалыптасады. Өмірлік ұстанымы Отанға адал қызмет ету, елге пайдасын тигізу, сөйтіп қоғамды алға қадам бастыру сияқты парасатты адамға тән мінезі де ана сүтімен келген тәрбиесіне еңбек ете жүріп жинақтаған тәжірибесі қосылып білікті басшы бола білді. Осындай озық ойлы азаматқа тән мінезін, байқаған сол кездегі жоғарғы басшылық, аудандық партия комитеті Малгелді Қайыржанұлын сол кездегі дәрежесі биік оқу орны Алматы жоғары партия мектебіне жолдама береді. Бұл оқу орнын жақсы деген бағамен 1979 жылы тәмамдаған М.Қ. Жұмағұловты Юрьев совхозының Коммунистік партия ұйымы партия комитетінің хатшысы етіп бір ауыздан сайлайды. Қызмет ете жүріп тәжірибе жинақтаған Малгелді Қайыржанұлы бұл қызметті де табысты атқарып, мемлекет тарапынан көптеген марапаттарға ие болады. 1999 жылдан бастап зейнеткерлікке шыққанға дейін Успеноюрьев селолық округінің әкімі қызметін үлкен абыроймен атқарып, ел құрметіне бөленді. Отанымыздың жоғары наградасының иегері атанып, кеудесіне «Құрмет» орденін тақты. Ұл өсірді, қыз тәрбиеледі. Ұлын ұяға, қызын қияға қондырды. Алма Балтабайқызы екеуі ата-әже атанып, немере әлдиледі.
Егемендікке ие болған тәуелсіз Қазақстанға адал еңбек етіп, құрметке ие болып, елі сыйлаған ер атанды. Бурабай ауданының «Құрметті азаматы» атағын алды. Зейнет жасына жетсе де еңбек етуге жалықпайтын азаматты Бурабай аудандық ардагерлер Кеңесінің төрағасы қызметіне сайлады. Бұл жұмысты да асыл азамат жоғары деңгейге көтере білді. Ел ардагерлерінің өтініш, арыздарында айтылған көкейкесті мәселелер Малгелді Қайыржанұлының араласуымен шешімін тауып жатты.
Қызығымен қатар әттең-айы қатар жүретін өзен өмірде Малгелді Қайыржанұлының тататын дем-тұзы таусылып, кенеттен өмірден озды. Ойламаған жерде асыл аға дүние салды. Елі күңіреніп келіп, ақ арулап ақырғы сапарына шығарып салды. Дұға бағыштады. Пайымы мол, тілегі түзу қайратты да парасатты Малгелді Қайыржанұлының жарқын бейнесі көзден кетсе де көңілден кетпейді. Ортамызда болса сексенге келер еді…
Артында қалған ұл-қызына, немере-шөберелеріне амандық берсін. Алма Балтабайқызына денсаулық, ұзақ ғұмыр тілейміз.
Еске алушы: бір топ жолдастары атынан Жасболат Қойбағарұлы, Өтелбай Төлеуұлы