«Қазақстан теміржолы ұлттық компаниясы» АҚ-ның Щучинск қаласындағы рельс дәнекерлеу кәсіпорыны теміржол саласына зор үлес қосып келе жатқан ұжымның бірі екендігі белгілі. Аталмыш кәсіпорнында бүгінгі күні төрт жүзге жуық адам қызмет атқарып, елмен елді елдестіруге, сапалы рельс шығару арқылы экономикамызды көтеру үстінде. Бұл жерде ер азаматтармен иық тіресіп, кәсіпорынның дамуына күш салысып нәзік жандылар да еңбек етіп жүр, соның бірі Қызылорда облысы, Қармақшы ауданы, Жусалы елді мекенінде 1962 жылы 29 желтоқсан айында дүниеге келген Шырайкүл Байтөлепқызы Малаева. Бала кезінен армандаған мамандығы есепші болу еді. Мектепте оқыған кезінде кез-келген математикалық қиын есептерді сыныптастарынан бұрын есептеп шығаратын, мектепте жақсы оқыды. Шырайкүл өзінің аңсаған мамандығына қол жеткізіп, бүгінгі таңда Щучинск қаласындағы рельс дәнекерлеу кәсіпорының персонал жөніндегі менеджер болып қызмет атқарады. Өзінің ортасында сыйлы да, қадірлі Шырайкүл Байтөлепқызы 2019 жылы теміржолшылар мерекесіне орай «Адал еңбегі үшін» төсбелгісімен марапатталған.
— Теміржол саласына еңбек сіңіріп, елдің дамуына үлес қосып жүргенімді зор мақтаныш санаймын. Оның үстіне біздің кәсіпорын Қазақстан Теміржолының ішіндегі беделі зор кәсіпорын екендігін барлығы жақсы біледі. Бұл жерде ауданымызға қарасты ауылдардан, қала орталығынан тіпті облыс орталығы Көкшетаудан келіп қызмет атқаратын азаматтар бар. Барлығымен ортақ тіл табысып, теміржол саласының дамуына үлес қосып жатырмыз. Әркім білген ғылымымен қызмет қылғаны жөн демекші, біздің кәсіпорынның барлық азаматтары өз ісінің білгір мамандары. Республика бойынша тоғыз жолдың торабын бір жерге түйістіріп, темірден түйме түйе білетін кәсіби мамандар. Жауаптылық бізде зор. Сондықтан да, барлығымыз бір үйдің баласындай болып өмір сүріп еңбек етіп жатырмыз. Экономист мамандығы бойынша алған білімді елдің дамуына арнап келемін. Біздің атқарып жатқан жұмысымыз елдің ертеңі нұрлы, жарқын болашағы үшін!-дейді Шырайкүл Байтөлепқызы.
Еңбек адамы Шырайкүл Малаеваға еңбегіңіздің еселеп жемісін көріп, әрдайым жұлдызыңыз жоғары болып, мәуелі бәйтеректей жапырағыңызды жая беріңіз дейміз!
Redaktor