Жыл үздігі — 2023
Қазақ әнінде халық өнерінің әр кезеңдегі тыныс-тіршілігі, танымы, өз заманының үні көркем тауып, қазақ ән өнерінің көнеден келе жатқан нұсқаларының көпшілігі ұлттық дәстүрлі ән өнерінің көшбасшылары Ақан, Біржан, Жаяу Мұса, Ыбырай сияқты бір туар дарын иелерінің мұралары. Дарқан даланы той-думанға бөлеген өзі әнші, өзі жыршы, өзі балуан, өзі батыр ұлдарының ғасырдан ғасырға жалғасып келе жатқан ән өнері, «Ән көңілдің ажары» деген ұлағатты сөзі баршаға аян. Оған жан иесінің әр сәтін ән арқылы әсем безендіріп, нанымды суреттеп, осы күнге жеткен қазақтың бай ән мұрасы мысал бола алады.
Киелі қара домбыра мен қобыздың сүйемелдеуімен айтылатын әндер күрделі ырғақ иірімдерімен ерекшеленеді. Домбырамен тек әннің «төресі» шырқалған.
Осы ұлы дәстүр қазіргі таңда да жалғасын тауып, заманға сай «Әнші ауыл» деген жобамен жыл сайын ән байқауы өтеді.
Биылғы жылы облыстық халық шығармашылық және мәдени демалыс орталығы мәдениет саласы қызметкерлері мен көркемөнерпаздар ұжымдары арасында байқау өткізді. Оған қатысушы 42 өнерпаз бақ сынады. Бурабай ауданынан төрт номинация бойынша бірнеше үміткер қатысты. Әділ қазылар алқасының шешімімен Бурабай аудандық мәдениет үйінің «Әнші ауыл» жобасы үздік деп танылды. Сондай-ақ, аудандық мәдениет үйінің ұжымы «Жыл үздігі — 2023» облыстық байқауының «Үздік креативті жоба» номинациясы бойынша да жүлдегер атанды.
Айта кетейік, облысымыздың клубтық мәдени нысандарын сақтау және одан әрі дамыту, шығармашылық жетістіктерін анықтау және талантты, өзіндік ерекшелігі бар шығармашылық ұжымдар мен қызметкерлерді қолдау, мәдениет пен өнерді насихаттау, қатысушылардың кәсіби шеберлігін арттыру, оларды ынталандыру байқаудың мақсаты басты. Аудандық мәдениет үйі ұжымын жеңістерімен шын жүректен құттықтап, оларға шығармашылық мол табыс тілейміз.
Бурабай аудандық Мәдениет үйі