1995 жылы Қазақстан Республикасының Төтенше жағдайлар жөніндегі мемлекеттік комитеті құрылды. Содан бері кең байтақ елімізде бұл комитет кеңінен жұмыс атқарып келе жатыр. Сейсенбі күні Щучинск қаласынының орталығында ауданымыздағы төтенше жағдайлар комитетінің қатысуымен арнайы іс-шара болып өтті. Аталмыш іс-шарада төтенше жағдайлар орын алған кезде оған тойтарыс беретін техникаларды көрсетіп, осы салада еңбек етіп жатқан құтқарушылар сап түзеді. Салтанатты шараға Бурабай ауданының әкімі Арай Садықов қатысып, еліміз үшін маңызды мереке құтқарушылар күнімен барлық қатысушыларды құттықтады. Біздің ауданның төтенше жағдайлар бөлімінің қызметкерлері жалғыз ауданымыз үшін ғана еңбек етіп жатқаны жоқ. Мысалы осыдан бір жыл бұрын Қостанай облысында болған өрт кезінде барып, арнайы көмек қолдарын созса, биылғы жылы Шығыс Қазақстанда болғанда төтенше жағдайда, яғни орман өртінің өршіп кетпеуіне, уақытында ауыздықтауына ат салысты. Аудан басшысы салтанатты шараға сап түзеп, қатысып отырған (осы салада қызмет атқарып зейнеткерлікке шыққан қарт ардагерлерді) және өрт сөндірушілерді, офицерлерді мерекелерімен құттықтады. Өз істерінің кәсіби мамандарын «Мінсіз қызметі үшін» ІІІ дәрежелі, ІІ дәрежелі төсбелгілерімен марапаттады.
Сонымен қатар Ақмола облысы Төтенше жағдайлар департаменті ардагерлер кеңесінің төрағасы Жанат Қарабалин құтқарушылар күнімен барлық қатысушыларды құттықтап, қашанда елдің тыныштығы үшін аянбай еңбек етіп жатқан құтқарушылардың еңбегі адал, осындай іс-шараны ұйымдастырып мұрындық болып жатқан, аудан басшыларына алғысын айтты.
Жиынның соңында көркемөнерпаздар ұжымдары мерекелік концерт қойды.
